: जिल्हादंडाधिकारी संजय यादव
धुळे, दि. 7 (जिमाका वृत्तसेवा) : राज्य शासनाने जाहीर केलेल्या MISSION BEGIN AGAIN च्या पाचव्या टप्प्यात बुधवार 8 जुलै 2020 पासून प्रतिबंधित क्षेत्र (Containment Area) वगळता हॉटेल, लॉज, गेस्ट हाऊस 33 टक्के क्षमतेसह सुरू करण्यास सशर्त परवानगी देण्यात येत आहे, असे जिल्हाधिकारी तथा जिल्हादंडाधिकारी संजय यादव यांनी कळविले आहे.
जिल्हाधिकारी श्री. यादव यांनी म्हटले आहे, राज्यात कोरोना विषाणूमुळे (COVID-19) उदभवणाऱ्या संसर्गजन्य आजारामुळे आरोग्य विषयक आपत्कालिन परिस्थिती निर्माण झालेली आहे. जागतिक आरोग्य संघटना व आरोग्य व कुटुंब कल्याण मंत्रालय, भारत सरकार यांनी या संसर्गजन्य रोगाच्या नियंत्रणास्तव प्रसारित केलेल्या विविध उपाययोजनांची अंमलबजावणी व राज्यात कोराना विषाणूमुळे (COVID-19) उद्भवलेल्या संसर्ग रोगाच्या नियंत्रणास्तव आपत्कालिन उपाययोजना करण्याची आवश्यकता निर्माण झाली असल्याने साथरोग अधिनियमानुसार राज्यात साथरोग अधिनियमातील विविध खंडानुसार अंमलबजावणी 13 मार्च 2020 पासून सुरू आहे.
त्यानंतर राज्य शासनाने संपूर्ण राज्यात MISSION BEGIN AGAIN च्या पाचव्या टप्प्याची घोषणा केलेली आहे. त्यानुसार बुधवार 8 जुलै 2020 पासून संपूर्ण महाराष्ट्र राज्यात हॉटेल, लॉज व गेस्ट हाऊस 33 टक्के क्षमतेसह सुरु करण्याबाबत मार्गदर्शक सूचना प्रसिध्द केली आहे. या पार्श्वभूमीवर जिल्हाधिकारी श्री. यादव यांनी आपत्ती व्यवस्थापन अधिनियमान्वये मिळालेल्या अधिकाराचा वापर करुन धुळे महानगरपालिका क्षेत्रासाठी कोविड-19 विषाणूचा प्रादुर्भाव रोखण्यासाठी घोषित केलेले प्रतिबंधित क्षेत्र वगळून पुढीलप्रमाणे आदेश दिले आहेत.
या आदेशात म्हटले आहे, बुधवार 8 जुलै 2020 पासून हॉटेल, लॉज व गेस्ट हाऊस आदी 33 टक्के क्षमतेसह सुरु करण्याबाबत हॉटेल, लॉज व गेस्ट हाऊस चालक तसेच ग्राहकांसाठी पुढील अटी व शर्तींच्या अधीन राहून परवानगी देण्यात येत आहे. त्यात कोराना विषाणूपासून बचावासाठी उपाययोजनांची माहिती देणारे फलक, पोस्टर, एव्ही मीडीया हॉटेल, लॉज व गेस्ट हाऊसच्या दर्शनी भागात लावावा. गर्दीचे योग्यरीत्या नियोजन करून योग्य ते शारीरिक अंतर राखण्यासाठी वर्तुळे आखावीत. प्रवशेव्दाराजवळ थर्मल स्क्रीनिंग, रिसेप्शन टेबलजवळ प्रोटेक्शन ग्लास लावावा. पायाने वापरता येणारी (पेडल ऑपरेटेड) हँड सॅनिटायझर मशीन लावावीत. कर्मचारी आणि ग्राहकांसाठी फेस मास्क, फेस कव्हर व ग्लोव्हजचा वापर करावा. चेक इन आणि चेक आऊट करण्यासाठी QR कोड, ऑनलाईन फॉर्म, डिजिटल पेमेंट, ई-वॉलेट अशी विना संपर्क वापरता येणाऱ्या प्रणालीच्या वापरावर भर द्यावा. लिफ्टमध्ये व्यक्तींची संख्या मर्यादीत असावी. प्रत्येक रुमच्या एसीचे तापमान 24 ते 30 अंश सेल्सिअस दरम्यानच असावे. हॉटेल तसेच बाहेरील आवारात योग्य ती पार्किंगची व्यवस्था करावी.
लहान मुलांकरीता खेळण्याचे क्षेत्र, जलतरण तलाव, जिम, व्यायामशाळा (जेथे लागू असेल तेथे) बंद राहतील. समारंभ आवारात मोठ्या प्रमाणात मेळावा, मंडळी निषिध्द राहतील. तथापि, जास्तीत जास्त 15 व्यक्तींच्या सहभागाच्या अधिन राहून 33 टक्के क्षमतेचा बैठकी हॉलचा वापर करण्यास परवानगी राहील. प्रत्येक वेळी पाहुणे खोली रिकामी झाल्यावर खोली आणि इतर सेवा क्षेत्राची साफसफाई, स्वच्छता व निर्जंतुकीकरण करणे आवश्यक राहील. ग्राहकांचा मुक्काम संपल्यानंतर सदर खोली किमान 24 तास रिकामी ठेवून त्यातील कापडी वस्तू बदलणे आवश्यक राहील. आवारातील शौचालय, पाणी पिण्याची व हात धुण्याची जागा येथे वारंवार स्वच्छता ठेवावी. क्वचित वेळी स्पर्श होणाऱ्या पृष्ठ भागांची नियमितपणे साफसफाई व निर्जंतुकीकरण (1 टक्के सोडिअम हायपोक्लोराइडचा वापर करुन) करणे हे प्रत्येक अतिथी गृहात व इतर ठिकाणी अनिवार्य आहे. (कडीकोंडे, स्वयंचलित जिन्याची बटने, स्वच्छतागृहातील बटने, आधारासाठी किंवा तोल राखण्यासाठी धरावयाच्या जिन्यातील, बाथरुम मधील वगैरे कडीची दांडी, जिन्याचा कठडा).
एखादी व्यक्ती कोविड-19 सकारात्मक आढळली, तर परिसरातील निर्जंतुकीकरण करण्यासाठी आवश्यक ती कार्यवाही करावी. संशयित व्यक्ती अथवा रुग्णाचे घर त्याची वसाहत तसेच त्याच्या राहण्याच्या खोलीचा इतर व्यक्तींशी संपर्क येणार नाही याची दक्षता घ्यावी. संशयित व्यक्ती अथवा रुग्णाची माहिती त्वरीत जवळच्या वैद्यकीय इस्पितळास अथवा आरोग्य केंद्रास द्यावी. अथवा राज्याच्या किंवा जिल्ह्याच्या मदत केंद्रावर त्वरीत माहिती द्यावी. तसेच हॉटेल, लॉज व गेस्ट हाऊस येथे निवासासाठी येणाऱ्या ग्राहकांनी पुढील सूचनांचे पालन करावे. कोरोना विषाणूची लक्षणे नसलेल्या व्यक्तींनाच प्रवेश देण्यात देण्यात येईल. फेस मास्क असल्यासच प्रवेश, हॉटेल, लॉजमध्ये वावरताना संपूर्ण वेळेत मास्क घालणे आवश्यक राहील. ग्राहकांचा, प्रवाशांचा तपशील (प्रवासाचा इतिहास, वैद्यकीय स्थिती) आणि ओळखपत्र स्वागत कक्षात देणे बंधनकारक असेल. आरोग्य सेतू ॲप वापरणे बंधनकारक असेल. हाऊस कीपिंगची सुविधा कमीत कमी वापरण्यावर ग्राहकांनी भर द्यावा. तसेच हॉटेल व लॉज सारख्या ठिकाणांचा सध्या क्वारंटाइन सेंटर म्हणून वापर होत असल्यास महापालिका किंवा जिल्हा प्रशासनाच्या पुढील आदेशापर्यंत त्याचा क्वारंटाइन सुविधेसाठीच वापर केला जाणार आहे किंवा 33 टक्के क्षमतेसह सुरळीत कामकाजास परवानगी मिळाल्याने उर्वरित भाग (67 टक्के) महापालिका किंवा जिल्हा प्रशासनाकडून क्वारंटाइन सेंटर म्हणून वापरला जाऊ शकतो.
सदरचा आदेश हा सद्य:स्थितीत व भविष्यात कोविड-19 प्रतिबंधित क्षेत्र घोषित झालेल्या क्षेत्रास लागू राहणार नाही. सदरच्या (Containment Area) प्रतिबंधित क्षेत्रात कन्टेन्मेन्ट अधिसूचनेनुसार घोषित प्रतिबंधानुसार अंमलबजावणी होईल. शासन आदेशाचे उल्लंघन करणारी व्यक्ती, संस्था अथवा संघटना,आस्थापना विरुध्द आपत्ती व्यवस्थापन कायदा, साथरोग प्रतिबंधात्मक कायदा, मुंबई पोलिस अधिनियम, फौजदारी प्रक्रिया संहिता व भारतीय दंड संहितेच्या कलमातील तरतुदीनुसार दंडनीय योग्य त्या कायदेशीर कारवाईस पात्र राहील, असेही जिल्हाधिकारी श्री. यादव यांनी म्हटले आहे.
00000
