शिर्डी प्रतिनिधी
शिर्डी लाखो भाविकांचे श्रद्धास्थान असलेल्या साई मंदिराच्या दानपेटीत गुरुपोर्णिमेला तब्बल साडे चार कोटींचे दान जमा झाले आहे. यामध्ये रोखरक्कम, बँक चेक, ड्राफ्ट तसेच सोने चांदी आणि सतरा देशांचे परकीय चलन यांचा समावेश आहे. गुरुपौर्णिमेला १ लाख ८६ हजार ७८३ साईभक्तांनी दर्शनाचा तर २ लाख ५४१ साईभक्तांनी प्रसाद भोजनाचा लाभ घेतला आहे. सर्व धर्मिय भाविक साई मंदिराच्या दर्शनासाठी देश-विदेशातून येत असल्याने शिर्डीला सतत गर्दी असते. यामध्ये मोठ्या देणगीदारांची संख्याही लक्षणीय असल्याने या मंदिराला रोज लाखो रुपयांच्या देणग्या भाविक देतात. गुरुपोर्णिमा, दसरा, रामनवमी हे तीन प्रमुख उत्सव साई संस्थानातर्फे दरवर्षी आयोजित केले जातात. या काळात भाविकांची संख्या मोठी असते. यंदाचा गुरुपोर्णिमा उत्सव १५ ते १७ जुलै या कालावधी साजरा झाला. या तीन दिवसात साई मंदिर आणि परिसरातील दान पेट्या पैशाने खचाखच भरल्या गेल्या. त्याची मोजणी गुरुवारी करण्यात आली. याविषयी अधिक माहिती देताना साई संस्थानांचे मुख्य कार्यकारी अधिकारी दीपक मुगळीकर म्हणाले, 'गुरु पोर्णिमा उत्सव काळात साई मंदिराला तीन दिवसात एकूण ४ कोटी ५२ लाख रुपये देणगी रूपाने मिळाले. यामध्ये दक्षिणापेटीत २ कोटी १२ लाख ९९ हजार १५८, देणगी काऊंटर १ कोटी ७ लाख ३ हजार ३५१ रुपये, बँक डेबीट-क्रेडीट कार्ड, ऑनलाईन, चेक-डी.डी., मनीऑर्डर देणगी आदीव्दारे रुपये १ कोटी ३ लाख ८ हजार १८० रुपये, सोने ६४५.०१५ ग्रॅम रक्कम रुपये १८ लाख ८७ हजार व चांदी ५०३२ ग्रॅम रक्कम रुपये १ लाख ३० हजार, १७ देशांचे परकिय चलन अंदाजे रुपये ८ लाख ९४ हजार ४४४.५० यांचा समावेश आहे' गुरुपौर्णिमेला १ लाख ८६ हजार ७८३ साईभक्तांनी दर्शनाचा तर २ लाख ५४१ साईभक्तांनी प्रसाद भोजनाचा लाभ घेतला आहे. तर दर्शन रांगेतुन २ लाख १० हजार ४००साईभक्तांना मोफत बुंदी प्रसाद पाकीटांचे वाटप करण्यात आले. या कालावधीत १ लाख ७८ हजार १४६ लाडू प्रसाद पाकीटांची विक्री झाली. तसेच साई संस्थानाच्या विविध भक्त निवासस्थाना मधून ४९ हजार५५४ साईभक्तांची निवासाची व्यवस्था करण्यात आली. या उत्सवासाठी ४० पालख्या शिर्डीला आल्या होत्या त्यांची निवासाची व्यवस्था संस्थांतर्फे करण्यात आल्याची माहिती मुगळीकर यांनी दिली.
