मुंबई : आगामी विधानसभा निवडणुकीच्या पार्श्वभूमीवर काँग्रेसने राज्यात पक्ष संघटनेची बांधणी नव्याने हाती घेतली असून त्याची सुरुवात प्रदेशाध्यक्षपदापासून करण्यात येणार आहे. महाराष्ट्र प्रदेश काँग्रेसची धुरा राज्यातील ज्येष्ठ काँग्रेस नेते बाळासाहेब थोरात यांच्याकडे सोपवली जाणार असल्याचे काँग्रेसमधील एका वरिष्ठ नेत्याने आज सांगितले. थोरात यांच्या नियुक्तीसोबतच राज्यात तीन कार्यकारी अध्यक्षही नियुक्त करण्यात येणार आहेत. यात मुस्लिम, मागासवर्गीय आणि एक इतर जातीतील नेतृत्वाला संधी देवून सर्वसमावेशक टीम बनवण्यात येणार असल्याचेही हा नेता म्हणाला. लोकसभा निवडणुकीत काँग्रेसचा महाराष्ट्रातही दारूण पराभव झाला. राज्यातील लोकसभेची केवळ एक जागा काँग्रेसला जिंकता आली. खुद्द अशोक चव्हाण यांचाही नांदेडमध्ये पराभव झाला. या पराभवाची जबाबदारी स्वीकारत चव्हाण यांनी प्रदेशाध्यक्षपदाचा राजीनामा दिला होता. हा राजीनामा आता पक्षश्रेष्ठींनी स्वीकारल्याचे सांगितले जात असून राज्यात काँग्रेसची धुरा बाळासाहेब थोरात यांच्याकडे देण्यावर एकमत झाल्याचे सूत्रांचे म्हणणे आहे. प्रदेशाध्यक्षपदासाठी बाळासाहेब थोरात आणि हर्षवर्धन पाटील या दोन नावांचा विचार झाला. या दोन्ही नेत्यांशी सविस्तर चर्चा करण्यात आली. त्याअंती थोरात यांच्या नावाला पक्षश्रेष्ठींनी पसंती दिल्याचे सूत्रांनी पुढे नमूद केले. दरम्यान, राधाकृष्ण विखे पाटील यांनी विरोधी पक्षनेतेपद सोडून भाजपात प्रवेश केल्यानंतर बाळासाहेब थोरात यांच्याकडे काँग्रेस विधिमंडळ नेतेपदाची जबाबदारी सोपवण्यात आलेली आहे. त्यात आता प्रदेशाध्यक्षपदाची धुरा हाती आल्यास थोरात यांचं पक्षातील वजन आणखी वाढणार आहे. थोरात यांनी काँग्रेस-राष्ट्रवादी आघाडी सरकारमध्ये कृषी आणि महसूल खात्याची जबाबदारी सांभाळलेली आहे. अहमदनगरच्या राजकारणात त्यांचा मोठा दबदबा आहे. २००९ मध्ये सर्वप्रथम ते संगमनेर विधानसभा मतदारसंघातून निवडून आले. त्यांनी अनेक शिक्षण संस्था स्थापन केल्या. दूध सहकारी चळवळीचंही त्यांनी नेतृत्व केलं. नगरमध्ये विखेंचे कट्टर प्रतिस्पर्धी म्हणून थोरातांची ओळख आहे.
